من درر ابن عديلة
في شأن الوضع المنيل بنيلة
كنا إذا قلبت لنا الدنيا ظهر المجن، وألبستنا أعظم ما لديها من الخوازيق، اجتمعنا بغية الهروب من المحن، وذلك في مجلس لنا على قارعة الطريق، وهناك نتحلق في دائرة، نلوك الوقت كما النساء الحائرة، حتى إذا هل علينا الفيسلوف، وهو رجل قد أوتي من الحكمة ضروب وصنوف، لكثرة ما مرمطته الظروف، فتراه حينا أسدا وأحيانا خروف، جال الدنيا بأجمعها، مشرقها ومغربها وعربها وأعجمها، فأوتي من الخبرة أجمعها، ومن النوادر أعجبها، ناهيك عن دمه الخفيف، ومعشره الحلو اللطيف، حتى صار عندنا علامة البلدة، وهو في مجلسنا فاكهة القعدة، واسمه نصحي بن عبده بن زكريا بن محسن بن نجاتي بن عم سيد بتاع البليلة، المعروف بنصحي بن عديلة، فإذا هل علينا ودخل في وسط الدائرة وتمركز، وانجعص في جلسته وطلب الشيشة وتعنطز، قال يا أبنائي هاتوا ما عندكم، مانا مش فاضي غير لأمكم، فقلنا يا مولانا لقد أصبح حال البلد مهزلة، وكل حاجة فيها ماشية سبهللة، ولم يعد للإنسان فيها دية، وسُلبت كرامته وحقوقه الإنسانية، وهل أتاك حديث محافظ القليوبية، إذ يحاول تبرير ما عم بالبلاد من إنقطاع للعيش والكهرباء والمية، فيزعم أن هذه رسالة إلهية، ويتمادى المدعوق في تبرير فساد نظامه الظالم، فيدعي أن هذا يضاعف ثواب الصائم، فشخر الفيلسوف شخرة من نوع القتة، وأتبعها بأحة من بلاد الإسكندر الأكبر، وقال يكونش الموكوس فيه من الملايكة حتة، أم لعله قد أصبح شيخا للأزهر، أم هل أوتي ابن حسين قبسا من نور السماء، فكم ذا بمصر من المضحكات ولكنه ضحك كالبكاء، يا أبنائي لقد استشرى فساد النظام، وعما قليل ليهلكن الزرع والحرث والأنام، مالم يثر هذا الشعب ضد ظلم الحكام، فقلنا يا مولانا اتقل وشوف اللي جاي، اسمع دي وماتقولش ازاي، امن الدولة راخر بقى يعمل مظاهرات، ونازل لك راخر في الشارع بيقول هتافات، والمصيبة تسأل الواحد منهم انت ليه واقف، يقولك والله انا مخبر لا انا فاهم ولا عارف، فأغرق الفيلسوف في الضحك حتى بدا كثمل غارق في المجون، وتبدلت هيئته حتى صار كشيخ أصابه الجنون، وقال يللا خلاص ماهي زاطت، منهم لله خلوا سمعة النضال باظت، ناقص بقى ينزلولهم عساكر أمن مركزي يسحلوهم، ومن قفاهم على لاظوغلي يسحبوهم، ويدوقوا طعم الطوارئ بالمرة، ويجربوا عيشة المعتقل المرة، وياسلام بقى لو تكمل التمثيلية، ويحاكموهم محاكمة عسكرية، ومادام الحكاية كلها هلس في هلس، ادعوا ربنا يودوهم ورا الشمس، فقلنا يا مولانا داحنا لسه جايينلك في الكلام، فهل سمعت قبلا عن تهمة تدعى إغتيال الأحلام، أي والله يا مولانا طلع علينا واحد ابن حلال، يتهم ايمن نور بإغتيال أحلام جمال، والأدهى يا مولانا أي حلم ذاك الذي يريد، إنه حلم توريثنا كما المتاع والعبيد، تلك يا مولانا أحلام أهل النجاسة، باعوا الوطن يا مولانا في سوق النخاسة، حتى صار يملّك من الأب للإبن بالوراثة، وعلى جميع المواطنين السمع والطاعة، فما نحن لهم إلا بضاعة، يبخس ثمنها كل ساعة، وطوبى لأهل الرضا والقناعة، وأما من كانت نفسه طماعة، وسولت له مجرد الإعتراض، فكلابهم له بالمرصاد، وليكن في أيمن نور عبرة للمعتبرين، الراجل اتشمط سجن اربع سنين، فلما بلغ بنا الحديث هذا المقام، أشار إلينا الفيلسوف أن توقفوا عن الكلام، وانتفخت أوداجه غضبا حتى كاد يطق من جنابه، وانتفخت أشياء أخرى منعت من ذكرها الرقابة، وقال يا أبنائي لقد طفح الكيل وفاض السيل، ولئن لم يفق هذا الشعب من سباته ليشرقن عليه من بعد الليل ليل. أهـ
14 استعبطوا معايا:
لأ..
إستعباط إستعباط يعني..
أول زيارة ومش الأخيرة..
سلامي لإبن عديلة :)
والله ابن عديلة دا هايل
وما دام هو شخصية ناصحة وناجحة كدا
ياريت تكمل بقية الدرر فى بوستات تانية
تحياتى وتقديرى وكل سنه وانت طيب
درش
إنه ليسعدني والله ان المدونة عجبت حضرتك كده ياباشا .. منور
سال
لما مرارة ابو عديلة تتعدل ياباشا ويظبط الطاسة تاني هيتحفكم بإذن الله
الترجمة : لما قريحة العبد لله تفرز درر عديلية تاني هحطها بإذن الله :D
وكل سنة وانت طيب
استعباطة دمها خفيف ..
كل سنة و إنت طيب يا مخبرنا الهمام :)
وانتي طيبة يابي
شكرا للمرور
السلام عليكم
إيه ياعم الجمال ده
بصراحة فكرتني بالمقامات بتاعة زمان
ربنا معاك يا باشمهندس
وكل عام وأنتم بخير
استعباطة جامدة بصراحة.بس صدقني ما فيش فايدة إحنا شعب لا ينقاد إلا بالصرم شعب يحب اللي يقوده يقوله : (ما أريكم إلا ما أرى) ور حمة بهذا الشعب العريق نتمنى له المستبد العادل اللي بيقولوا عليه أهو أحسن من الديمقراطية اللي ماتنفعش معاه خالص وأحسن من الاستعباد والمرمطة الجامدةوالايام السوده اللي عايشها
مصعب
دا أقل ما عندكم ياسيدي .. وانا سعيد جدا انها عجبتك .. وكل سنة وانت طيب
الصديق مجهول الهوية
نظرية برضه .. وليها منطقها .. بس انا رافضها .. انا عندي امل بإذن الله
ممكن .. ممكن يعني تقول بني ادم حالم .. اكمني لسه صغير شوية وماتمرمطتش في الحياة ولا خدت الخبرة الكافية .. بس أظن ان أي بني ادم في الدنيا عنده القابلية انه يبقى حر .. بس انت حسسه بإنسانيته وقيمته وكرامته الأول
هههههههههه
بجد ابن عديله ده فقري وينفع رئيس بلديه
بالحاجات اللي بيقولها ديه
وبقولك بمشاعر وديه
كل سنه وانت طيب
واشوفك على خير السنه الجايه
تحياتي
ماااااااااااجد
انت جاي تقطع على ابن عديلة في أكل عيشه وللا ايييييييييييه ؟؟؟
مش عاوزين نخسر بعض ياعم الحاج .. احنا حبايب آه .. بس الشغل شغل
وانت طيب ياعم الحاج
انا اول مره اجى استعبط عندك
ويارب ديما نستعبط كده بحسك
تقبل مرورى وصداقتى
لالالالالا أأأأأأ أقصد استعباطى
بس هما يسيبونا نستعبط بس يامرمر
نورتي واستعبطتي .. اهلا بيكي في عالم الإستعباط
تدوينة رائعة ومدونة اروع ...
ربنا يكرمك ويحققلك اللى بتحلم بيه
ومتابع معاك ان شاء الله
يا مرحب والله بالاسكندرانية أجدع ناس
أنت الأروع صديقي
تسعدني متابعتك
إرسال تعليق