تسمحلي اسألك سؤال ..بص يا سيدي .. ايه الفرق بين شخص اختار انه يتغدى فول وشخص تاني اختار انه يتغدى سي فود ؟
لأ لأ لأ
ماحناش هنا في درس عن التبذير والقناعة ولا الاغنيا والفقرا
طب تخيل معايا - تخيل بس وبلاش تطمع - ان الوجبتين كانوا مجانيتين ومتاحتين قدام الشخصين
والاول اختار الفول بارداته والتاني اختار السي فود أكيد بارادته برضه
يبقى ايه الفرق بين الاتنين ؟ الفرق بكل بساطة ان الشخص الاول عبيط
ليه ؟ لأنه اختار انه ياكل وخلاص ، ياكل مجرد أكلة
في حين ان التاني اختار انه ياكل اكلة بس مش اي اكلة
***
طب تعالى نطلع شوية بره نطاق المطبخطبعا من المعروف ان البني ادم له جسد وعقل وروح وقلب
وان كل حاجة من دول ليها الغذاء بتاعها
فاكر حتى اما كتير بنسمع " القراءة غذاء العقل " و " القرءان غذاء القلب " و " الموسيقى غذاء الروح " ... الخ من العبارات دي
تعالى بقى اسألك تاني نفس السؤال الأول على نطاق اتخن
ايه الفرق بين شخص اختار انه يغذي جسمه بس ( سواء بقا كان الغذاء ده فول او سي فود او حتى نبات بالصرف الصحي ) وشخص تاني اختار انه يغذي فوق جسمه عقله وروحه وقلبه كمان ؟
لو كنت اتفقت معايا ان الشخص اللي اكل الفول في السؤال الاول عبيط
يبقى انت اكيد هتتفق معايا ان برضه الجدع اللي اختار انه يغذي جسمه بس هو راخر عبيط
ليه ؟ لأنه اختار انه يعيش وخلاص ، يعيش مجرد عيشة
في حين ان التاني اختار انه يعيش عيشة بس مش اي عيشة
***
هو التاني دا بقا محمد عاطف وحسن البنا .. اختاروا السي فود .. قصدي اختاروا العيشة اللي هي مش اي عيشةمبذرين يا جدع ماعندهمش قناعة ابدا ، ايه دا ؟
لا والأدهى والأنكى واللي يغيظك بقا انهم عاوزين ينشروا الموضوع دهون بين شباب الصعيد
شباب الصعيد البريء الغلبان القطط المغمضة .. اللي بيخاف من غول مندور ابو الدهب
عاوزين هما يبوظوا اخلاقه ويجمعوله - قال ايه - عشرتلاف كتاب تحت مبادرة كده مسميينها " كتابي لأجلك " .. شوف وصلت لفين .. صحيح اللي اختشوا راحوا فصول محو الأمية .. اللي بيحصل دا يا جماعة اسمه استعباط علني
***
انا عارف ان في ناس هتقول طب مش اولى من الكتب دي يساعدوهم مساعدات مادية .. يدوا الفقرا فلوس او اكل او يساعدوا الشباب عشان الجواز او..او.. في ميت حاجة اولى من الكتب !وانا عارف طبعا ان المساعدات دي مهمة جدا .. جدا جدا جدا
بس مين قال انها اهم من الكتب ؟
بالعكس انا شايف ان الكتب تأثيرها افضل .. وانهم بالكتب دي ممكن يوصلوا للي هو اعلى من كده كمان .. وان كان تأثيرها دا بيبان على المدى البعيد بس احنا للأسف اتعودنا الاستعجال في كل حاجة حتى وان كان بيجيب نتايج اسوأ لدرجة ان احنا بنقول " خسارة قريبة أفضل من مكسب بعيد "
باختصار انا شايف ان احنا لما نديهم المساعدات المادية فـ احنا بنديهم السمكة
لكن لما نديهم الكتب فـ احنا بنعلمهم ازاي يصطادوا السمكة
السمكة مهما كبرت مسيرها في لحظة تخلص .. اما الصيد هيفضل معاك على طول
مش معنى كلامي برضه اني بقول بلاش نساعدهم ونفضل نديهم كتب وبس
لأنك لو علمت شخص الصيد وسيبته من غير أكل ، فـ قبل هو ما يتعلم ويعرف يصطاد هيكون مات
فـ المفروض انت تفضل تديله سمك كمان مؤقتا بس لحد ما يتعلم الصيد هو
يعني المفروض لحد احنا مانعلمهم " الصيد " لازم نفضل نديهم سمك .. لحد اما يعرفوا هما يصطادوا بنفسهم
وبالمناسبة برضه .. مش القراءة هي وسيلة تعليم الصيد الوحيدة .. لكن هي موضوعنا هنا
***
بالمناسبة برضه .. بما ان المدونة دي جعلت من الاستعباط عنوانها فـ اللي من البحيرة ونفسه يبوظ أخلاق شباب الصعيد ( يبعتلهم كتب ) ياريت يكلمني على 0107207192او يبعتلي على ميلي made.in.egypt.92@gmail.com
***
حدثنا ابن عديلة قال " ... مما يروى من حكايات الزمن السالف ، أن خطًا للصعيد كان يدعى ابن عاطف ، وكان يطوف بالأقوام والطوائف ، حاملا سيفه الخاطف ، راكبا فرسه " داهف" ، على جسده الملاءة لافف ، قائدا جيشه الزاحف ، شاحنا موبايله الهاتف ، مقاوما كل حاكم زائف ، لأموال رعيته لاهف ، ولعقولهم شاطف ، وعلى ظلمه وكرسيه عاكف ، وفيما هو بين البلدان طائف ، اذا برجل تحت شجرة عاكف ، تبدو عليه سيماء العارف ، إذ كان يقرأ في كتاب لدار المعارف ، فتقدم منه الجيش الزاحف ، فقام اليهم الرجل شجاعا غير خائف ، فترجل اليه خط الصعيد ، وبادره بالسؤال الأكيد ، وقال ما اسمك يا اخا الصعيد ؟ ، وما علة جلوسك في هذا المكان البعيد ؟ ، فقال محسوبك حسن البنا ، جلوسي هنا للتأمل في كل ذي معنى ، والتزود من الوان المعارف لونًا لونا ، وانا عن ترف الناس ولذاتهم أغنى ، فقال الخط ما رأيك يابن البنا ، لو انضممت الينا وأصبحت منّا ، فلعلك بمعرفتك تعنّا ، ننشر المعرفة بالكتب في بلادنا الوهنى ، فقال ابن البنا ، هذي والله فكرة حسنى ، إلي بسيف وجواد وجزما ، وسار الركب المتنامي ، الى هدفهم السامي ، حاملين الكتب على أسنة الرماح ، وكانوا إذا توقف بهم المسير في أي مستراح ، قال الخط للقوم : الخط ملحلح لحليح ، جول لع ، فهتف القوم لع ، فقال الخط منييييح ، فهتفوا جميعا : الجراية للدمييييع ... "ياريت يا جماعة ان الكل ( سواء اللي هيشارك او اللي مش هيشارك ) يساهم في نشر الفكرة ..
بالمناسبة .. احب اوضح ان المشاركة تبقا بنوعين .. اما انك تتبرع بالكتب .. او انك تتطوع لتجميع الكتب في محافظتك ..
لو عاوز تعرف تفاصيل اكتر ممكن تدخل مدونة المبادرة
او تكلم محمد عاطف ( 0146075050 )
او تكلم حسن البنا ( 0105795562 )
نسيت توضيح أخير كتر السؤال عنه .. وهو ان الكتب دي ان شاء الله هيتعمل بيها مكتبتين عامتين للشباب غير تابعتين لأي جهة في محافظات اسيوط وسوهاج
وجزاكم الله خيرا مقدما
بالمناسبة .. احب اوضح ان المشاركة تبقا بنوعين .. اما انك تتبرع بالكتب .. او انك تتطوع لتجميع الكتب في محافظتك ..
لو عاوز تعرف تفاصيل اكتر ممكن تدخل مدونة المبادرة
او تكلم محمد عاطف ( 0146075050 )
او تكلم حسن البنا ( 0105795562 )
نسيت توضيح أخير كتر السؤال عنه .. وهو ان الكتب دي ان شاء الله هيتعمل بيها مكتبتين عامتين للشباب غير تابعتين لأي جهة في محافظات اسيوط وسوهاج
وجزاكم الله خيرا مقدما
24 استعبطوا معايا:
ما هو لو سابوهم يدوا الكتب للناس الناس حاتتطلب حقها صح حتطلب سكن وتعليم وصرف صحي يبقي لأ سيبهم يدوهم أكل عشان مايفتحوش عنيهم ..فكرة كويسة وربنا يقدركوا عليها..انا كنت اتكلمت عن الموضوع دا في المدونة بتاعتي
http://fight-to-find-myself.blogspot.com/2009/09/2.html
ياريت تشرفني بالزيارة
اهلا محمود .. ماهي عشان كده في ناس نفسها ترفع شعار " كل ولا تقرأ "
نورت المدونة واشكرك لدعوتك لزيارة المدونة
جاري التنفيذ
على النعمة عسل يامخبر والله ايه الموهبة دى بجد ماشاء الله عليك حلوة اوى المقامة الهبدانية دى لا والا العارف اللى بيقرا لدار المعارف هههههههههه انشر ياعم الكلام ده فى كتب وسيبك من شغل هبل الدولة ده .
ربنا يخليك للغلابة يارب يا معلم
متهيالي لسه بدري على موضوع الكتب دا .. بس لو عندك ناشر اكيد مش هقول لأ .. او حتى رئيس تحرير جرنال .. مايضرش برضه
نورت ياباشا
ما أروعك من مستعبط ! أسلوبك مدهش ..أفكارك طيبة.. سخريتك قاتلة لكن حرص حرص ..فكم من قملاوي يمكن أن يتدسس لك . فيغرس كفه الغليظة في ياقة قميصك والأخرى يكبش بها حزامك وسروالك وينطلق بك إلى بلاد القمل.. القراية محتاجة قاري والقاري جعان والجعان لا يحلم إلا برغيف العيش الخالي من البق وأعقاب السجاير والحشرات والتروية بماء الخرة والخالي من دماء المتصارعين في طوابير العيش ...أنا معك في أن مشروع الجراية للدميع مشروع هادف ومهم .. وكان الله في العون .
دامت هذه المدونة الرائعة
أ/كحيان
ربنا مايكتب علينا القملاويين اياهم دول ياشيخ
انا من فصيلة القمل الاليف
شكرا لتشجيعك وياريت لو تشارك معانا
ا/ سال
وربنا يخليلنا حضرتك .. ويخلي مدونتك الرائعة .. شكرا لك
ماشى هشارك إن شاء الله و خصوصاُ إنى عندى كمية كتب عايزة أتخلص منها أساساً :D
لأنهم بصراحة كتروا و عندى كتب فيه منها نسخ كتير و مهما أوزع فيهم مابيخلصوش ..
طااايب .. انا دلوقتى تبع محافظة القاهرة او حلوان اللى تشوفه سيادتك يعنى ..
قوللى كدة بطريقة مبسطة علشان انا فهمى على قدى اعمل إيه ؟
ولو فيه شروط مثلاُ يا ريت تقولى عليها ..
يعنى عايزين كتب مستعملة ولا كتب جديدة و لا كتب مستعملة حالتها جيدة كله موجود بعون الله ..
طب كويس خالص يا بي
انتي شوفي مجمعين الكتب عندك في القاهرة وحلوان وكلميهم ..
واكيد كل الكتب هتبقا مطلوبة ، مش هيقولو لكتب لأ يعني .. سواء جديدة او لا حالتها جيدة او لا
ممكن ابقا اسألك انا مين بيجمع الكتب في القاهرة وحلوان لو مش هتعرفي
ولكم جزيل الشكر :D
بسم الله الرحمن الرحيم
السلام عليكم ورحمه الله وبركاته
بعدإذن حضرتك اناهااستهبل لاني مابحبش الاستعباط ...إن ما وصلنا اليه قاع الأنحطاط من بغداد للرباط مرورا بالقاهره والفسطاط ...
أمتعتني حقيقه بأسلوبك الجذاب اللذيذ. تقريبا قرأت الكثير بمدونتكم ...وسأعود لها مرات و مرات . بس ...بجد بدون أستعباط ما حقيقه مشروع تغريق سوهاج بالكتب المشحوته ؟
لك كل الود و التقدير ...
أحد أبناء سوهاج .
السلام عليكم
مشروع هادف رائعة ربنا معاكم
--
بالمناسبة مشروع تنقية مياه الشرب حصل في بلدنا برده
يالا كل سنة وانت طيب
عزيزي الفركشاوي اللي ناوي مش عارف على ايه
الاستهبال - كما الاستعباط - حق لكل مواطن واختلافنا العميق في الرؤي والاتجاه ( مابين الاستعباط والاستهبال ) لن يفسد للود قضية فنحن نرحب بالرأي الآخر .. حلوة الحتة بتاعت قاع الانحطاط دي ..
دي يا سيدي مبادرة لنشر القراءة في قلب الصعيد ( اسيوط وسوهاج ) عاوز تسميها شحاتة .. براحتك انت بقا
والتفاصيل هتلاقيها اكتر على مدونة المبادرة
مصعب .. وشك ولا وش القمر ياخي
فينك
ربنا يستجيب يارب
مبروك عليكم المية .. يحيا التفاؤل
اين هي مدونه المبادره ياسيدي
انا خايف تكون بوشك السمح دا بدلني علي قصر ثقافه تاني !
و الآخر يطلع مافيش عير المدونه دي في النت كله .
ألاقيها علي اي ناصيه ؟
ههههههههههههههههه
ماشي ياعم فركشاوي ..
عندك ياعم تقارير الجرايد عن المبادرة
ممكن لو دخلت مدونة المبادرة توضح الصورة اكتر .. وممكن تاخدها من قصيرها وتكلم محمد عاطف دوغري .. وبعدين هو بلدياتك يعني شهل تتواصل معاه برضه .. وبعدين ياعم اذا كناش عاوزين نخدمك يعني ونجيبلك الكتب لحد عندك .. ناس ناكرة للجميل صحيح .. نورت ياعم الفركشاوي
الا صحيح .. هو انت ناوي على ايه ؟
مُخبر ....
السلام عليكم ورحمه الله وبركاته
انا ما بقراش جرايد
ومحمد عاطف قاعد جنبي اهوه...
و مُش عايز ياخد الكتب ...
عايز تعرفني ناوي علي ايه ؟
ببلاش كده؟؟
فركشاوي
انا احترت معاك ومابقيتش فاهم الصراحة
بص .. انا متطوع في المبادرة دي مش منسق
التفاصيل كلها عند محمد عاطف وحسن البنا ( نمر تليفوناتهم عندك في الموضوع )
انا مش فاهم انت قصدك ايه بـ انك قاعد جنب محمد ..
وايه اللي ببلاش كده ؟
انا بهيس اذن كويس
حلو الشعار ده اوى
عجبنى اوى اسلوبك ف الكتابة
من اول البروفايل قعدت اسخسخ من الضحك على كمية الاشعار و لا المرتع الا المرتع ده
فكرنى بطه حسين وكتاب الايام هتاخده ف 3 ثانوية عامشة
بقولك يا قمل الدولة :)))))
شد حيلك كده فى اولى وخد بالك اوى من الانقسامات بتاعة الاحياء
عشان لو مفهمتهاش دلوقتى هتتعب ف الكلية اى كلية فيها طب
اه واحفظ كويس اوى كلمات عنجليزى
خلى عندك كده جبل كلمات تطل منه على موزبيق ماشى
وربنا يارب يارب يوفقك ويعينك على المشوار ده هو الحاجة الوحيدة اللى محتاجة الصبر بس
دمت بود وخير ويمن وبركات( ملك الحركات)
سلامات بقى
وتقبل مرورى
و الله ما عارفة اقولك ايه لكن اول حاجة حقولها اني سعيدة بانك عندك 16 سنة و ماشاء الله مطلع بص العالم دي عمرهم ما حيعملوا الناس عشان الناس متطلبتها متزدش يعنيي دلوقتي لا الناس تتعلم مش حيرضوا بوضعهم االاإنساني
و ربنا يعمي نظر حبايبنا قمل الدولة
اتمنى دوام التواصل
اهلا يا دوك
تشكرات على الكلمتين الحلوين دول
على فكرة انا مش هاخد ايام طه حسين عشان انا ثانوية ازهرية :D
تصدقي كنت عاوز اقراها الايام دي
بالمناسبة .. انا فـ تانية السنة دي .. فكرتيني اروح اعدل البروفايل بتاعي :D
الاحياء كانت من ارخم واسخم المواد في اولى طبعا بس اهي عدت على خير .. الانجليز ي والرياضة دول متعتي ماتخافيش :D
وربنا يستجيب دعاكي ويخليكي يارب
وربنا يرزقنا الصبر
متشكر جدا على مرورك ده
ماتحرمش
اسراء السقا
انا اللي سعيد جدا بردك ده
ربنا يكرمك يارب ويخليكي
ويعمي نظر حبايبنا اياهم :D
إرسال تعليق