هتعملوا ايه السنة دي ؟؟؟
السلام عليكم
لو زهقت من عيشتك المُـرّه خليك إيجابي لو مـــرّه
بجد بلدنا بتنهار على كل المستويات
كفايه ظلم و تعذيب و فساد و رشاوي و محسوبيات
كفايه كوارث في الدويقه و عباره السلام و قطار الصعيد و طياره مصر للطيران
إذا الشعب يوما ً أراد الحياة لابد أن يستجيب القدر
لابــــــــــد لليل أن ينجلى , لابد للقيد أن ينكســـــر
إتخنقت من حال البلد ؟
إتخنقت من الواسطه و الرشاوي و الظلم و الفساد ؟
إتخنقت من طوابير العيش ؟
إتخنقت من المواصلات الزحمه ؟
إتخنقت من المرتبات الضعيفه ؟
إتخنقت من غلاء الأسعار ؟
إتخنقت من قعده البيت أو القهوه من غير شغل ؟
إتخنقت من الحكومه اللي مش حاسه بينا ؟
إتخنقت من الحكومه اللي ماشيه في ديل إسرائيل ؟
إتخنقت من الحكومه اللي قافله المعبر في وش إخواتنا ؟
نفسك تعيش بكرامه في البلد ؟
نفسك لو بتدرس تلاقي تعليم كويس ؟
نفسك لو خلصت دراسه تلاقي شغل ؟
نفسك لو شغال تاخد مرتب يعيّشك ؟
نفسك تحس بالحريه و العدل و الامان في بلدك ؟
نفسك تفضل في بلدك بدل ما تسافر أو تهاجر ؟
لو الحكومه فاكره إنها بتحكم شعب ميت و مش حاسه بينـــــا
إحنا هنحس ببعض و هنقف جنب بعض و هناخد حقنا بإيدينا
بكل تحضّر و إنضباط و سلميّه
يوم 6 إبريل يوم كل المصريين
هنسيب لهم الشوارع فاضيه
مش هانخرج من البيوت
مش هنفتح المحلات و لا الصيدليات
مش هانروح المدراس و لا الكليـات
مش هانروح المصانع و لا الشركات
مش هانشغل التاكسيات و لا الميكروباصات
يوم 6 إبريل كل المصريين هايبقوا إيد واحده و قلب واحد
عايزين مرتبات , عايزين شغل , عايزين حرية , عايزين عدل
6 April 2009إضراب عام لشعب مصــــــــــر
إنشرها لوجه الله على كل أصحابك و زمايلك و جيرانك ع الإنترنت و ف الشارع
وايه رأيكم أصلا ف موضوع الاضراب الدوري ؟؟؟
هامش شخصي :
حسب ما يقول شباب 6 ابريل نفسهم فإن عدد الاضرابات من 6 ابريل 2008 حتى الان 1250 اضراب ( مانسبوش القول لنفسهم وانما قالوا ان الرقم ده اكده البعض )
وسواء كان العدد ده حقيقي او نص حقيقي حتى فمن خلال متابعة الاخبار بقت كلمة اضراب كلمة مألوفة للشعب المصري وبقت دارجة بشكل طبيعي هي وكلمة اعتصام في حتى الهزار اليومي
ومابقتش من المستحدثات زي السنة اللي فاتت مكنش حد يعرفها وبانت غريبة ع الناس
وده معناه ان لو 6 ابريل 2009 خد من الدعاية زي ما اخد 6 ابريل 2008
اعتقد هيحقق نتايج مذهلة بعد ما بقى حتى سواقين المقطورات مؤهلين للاضراب وباصرار غير عادي يوصل صوتهم لاعلى الاماكن وتأثيرهم لأبعد الحدود
17 استعبطوا معايا:
حجزت أول تعليق .........
بس هو الاضراب ده السنة دي كمان
الحقيقة ياريت نضرب طول العمر لأني الحكومة ابتدت تستهبل وفاكره اننا متنا
لازم نفوق
وأنا معاكم في الاضراب ده
وهي فرصة الواحد يغيب من المدرسة
تقبل تحيايت
يارب يا مصعب ياااااارب ياخويا
على فكرة احنا مدرستنا بطلت اصلا خلاص
الطلبة بطلوا معدش حد بيروح
الاضربات مستمره حتي تعود مصر حره
لا لا لا لا لا
معترضة جداً أوى خالص على فكرة الإضراب دى ..
الإضرابات دلوقتى بقت عاملة زى المسلسلات البايخة ..
ما انكرش إن بعضها نجح زى اضراب الصيادلة ..
لكن لو جينا للجد بقى ..
انا إيه اللى يخلينى أشارك فى إضراب معرفش مين اللى بيدعى ليه ..
هتقولى مقالوش أسماءهم علشان دواعى أمنية .. يا بنى دلوقتى .. لو عايزين يجيبوك هايجيبوك ..
غير كدة المبدأ ده ثابت "لا يغير الله ما بقوم حتى يغيرو ما بأنفسهم... "
لما نبقى كلنا بنعمل اللى علينا ..
و مش مقصرين فى أى حاجة يبقى لينا الحق نعمل إضراب ..
الحكومة مش شماعة نعلق عليها فشلنا و جهلنا و لو إن عليها جزء من المسئولية ..
كلامى طبعاً مش تعاطفاً مع الحكومة .. و اللى يعرفونى كويس يعرفو إنى من جزب المحظورين .. يعنى ألد أعداء الحكومة :)
ملحوظة - الإختلاف فى البطيخ لا يفسد للب قضية ..
عموماً يعنى انا مضربة عن المدرسة من أول السنة .. بمزاجى ..
و انا من النوع اللى نادراً جداً جداً جداً ما بشترى حاجة من السوبر ماركت أصلاً ..
يعنى كدة كدة ماليش دور فى الإضراب ..
خالد
I agree with you :D
نورت
بعبع
1 - كلامك ان الاضرابات مسلسلات بايخه مع عدم انكار ان بعضها نجح
الاضراب اللي نجح نجح لأن كان في ارادة
يعني فكرة الاضراب نفسها بريئة من الاتهامات المشكلة ف ارادة الناس هي اللي بتخلي الاضراب ينجح او يفشل
لو ده رايك انا متفق معاكي ودور الاعلام والداعين للاضراب بقا يوعو الناس عشان يبقى عندهم ارادة وينفذوا صح
وللا انتي رافضة فكرة الاضراب من الاساس ؟؟؟
في الحالة دي ابقا مختلف معاكي
===============
2 - كلامك عن " مين هما الداعين للاضراب"
الداعين للاضراب معروفين بالمناسبة
طبعا شباب ستة ابريل ومعاهم حزب الغد بزعامة ايمن نور وحزب الجبهة بزعامة اسامة الغزالي حرب ومعرفش اذا كان في احزاب تانية اعلنت انضمام رسمي ولا لا ومعرفش كمان موقف الاخوان الرسمي ايه
==========
3 - كلامك ان احنا لازم نعمل كل اللي علينا الاول وبعدين نضرب
مش معنى ان احنا مش بنعمل كل اللي علينا نسكت عن الظلم
انتي من مؤيدي نظرية ان " البلاوي دي كلها عقاب من ربنا " وللا ايه ؟
واحد بيشرب سجاير ومابيصليش
المفروض احنا نطالبه واحدة واحدة
ماينفعش نقوله ياتبطل السجاير وتصلي ف نفس الوقت يا ماتعملش احسن
يعني " مالا يدرك كله لا يترك كله "
======================
4 - كلامك عن عدم وجود دور ليكي ف الاضراب
دورك ف الاضراب مش شرط يكون تنفيذي يا بعبع لو مفيش دور تنفيذي يبقى ايمانك بالمبدأ نفسه ونيتك ماهي الاعمال بالنيات برضه والشيوخ طول عمرهم بيقولولنا ف الجامع انت ممكن لو بتلعب كورة تاخد عليها ثواب لو انت ناوي انك بتجدد بيها نشاط عشان تعبد ربنا يعني تعاطفك لوحده ممكن هنا
وكمان لو انتي متحمسة للفكرة ممكن دورك يقتصر ع الدعوة للاضراب لو انتي زي ما بتقولي مالكيش دور تنفيذي
ويبقى تعاطفك لوحده مش كفاية اتبرع ولو بدعوة
====================
ياللا ياختي اي خدمه عمال اعملك الرد ف نقط وعناصر وارد عليكي حتة حتة
على الله يطمر
بس المهم وجهة نظري تكون وصلت
يا عم إنت عايز تلبسنى أى تهمة و خلاص ..
ما قلتلك انا مش ناوية أضرب حد ..
شكراً عالتوضيح ..
بس برضه .. شباب 6 إبريل اللى فات دول مجهولين بالنسبة لى ..
يمكن انا جاهلة سياسياً ..
بس فعلاً مبحبش أعمل حاجة إلا لما اكون عارفة كل حاجة عنها ..
و فكرة الإضراب دى مش هتنجح ..
و ابقى قول بعبع قالت ..
يا بنى الناس أصلاً فى مصر بيتلككو علشان ياخدو أى اجازة و السلام ..
و مش فارقة معاهم بقى ياخدوها إزاى ..
و الإضراب اللى فات .. منجحش زى ما اتقال عنه .. بامارة نكتو الــ 30 % زيادة بتاعة المرتبات اللى ما تكفيش المواصلات أساساً ..
انا مش ضد فكرة الإضراب .. لكن لما يكون ليه هدف محدد و واضح ..
الإضراب اللى هيتعمل ده مش هيحقق أى حاجة ..
لأن أهدافه كتير و خيالية بعض الشئ و صعبة التحقيق ..
أما نشوف إيه اللى هيحصل وقتها ..
و ما زلت مضربة عن الإشتراك فى أى إضراب ..
شكرا علي تعلقك اللي عندي يا احمد
علي فكرة الليلات مش غلط ، فليلة جمعها ليالي وليلات - أنا سائل متخصص في الموضوع ده - بس علشان خاطر سعادتك غيرتها ولا تزعل نفسك
تحياتي
خلاص ياختي براحتك
مصعب .. شكرا ياباشا
اضراب واضربنا . خروج بلافتات فى الجامعات وخرجنا ولكن لم يسمع احد ولن يسمع .
بسم الله الرحمن الرحيم " وقالوا قلوبنا غلف بل طبع الله على قلوبهم "
لعن الله كل من ظلم هذا الشعب الذى لايستحق الا كل تقدير واحترام . لعن الله من افسد فى وطن هو اب للزمان وللتاريخ شاهدا على العصر منذ بدء الخليقه حتى ان اسم هذا الوطن لم يتغير منذ تسميته بأول اسم له وهو مصر . مصر
يا.باشا.ولا.أعرفك.بالحق.لو.تعرف.تجيب
الكتاب.بتاع.الأيام.الاخيرة.لعبدالحليم
قنديل.تبقي.عملت.فيا.جميلة
ازيك يا مهيس
بقيت عامل قلق
ياخوفي عليك يا تيكا
بس اسلوبك كل شويه في تطور
لسه محتاج شوية تكثيف في بعض الأحيان لكن اعتقد انك بالفعل مشروع صحفي هايل
الله عليك يا احمد يا عجمي بجد
نورتني والله ياباشا
ماتحرمش
ايه يا سيادة الريس
انت بتدور ع الايام الاخيرة عشان مستعجل على ايامك الاولى وللا ايه
متخافش هانت ان شاء الله
والله الكتاب مش عندي
بس نشوفه بي دي اف
معندكش انت " كتابي عن مبارك وعصره ومصره " لابراهيم عيسى ؟
ماما سيموز
هو حضرتك ع البلوجر وانا معرفش
ومن شهر 9 اللي فات كمان
بس بجد بجد والله العظيم وحشتني ردود حضرتك جدا
وحضرتك كمان طبعا
ربنا يخليكي لينا ويستجيب لنبوءتك
إيه أخبار الإضراب ؟؟
انت بتتكلم في ايه يا عم
يعني الصيدليات تقف والمستشفيات والدنيا
طب لو واحد عيان ولا واحد جاله اي حاله يروح فين
يروح لدايه تعالجه
وبعدين انت فاكر ان في حد ممكن يضرب عن المدرسه
لا ينكن يابني
فاكر انت لما رجعوا ساته ابتدائي
قام قالولك ايه بعدها بكذا سنه هايبقى في اولى ثانوي سنه فاضيه يقوم كل اللي في الثانوي ميدخلوش الامتحنات
وقابلني بقى اللي قاعد يقول ابويا
واللي يقول سنه من حياتي واللي يقول مستقبلي
وفي الاخر مبيحصلش حاجه
لا اضراب ينفع ولا مظاهرات ولا كلام من ده
كمان في مشايخ بيقولوا حرام المشاكره في الحاجات دي
لانها ماكانتش في زمن الرسول ولا الخلفاء مع انه كان في مصايب وقت الخلفاء يعني زي علي ابن طالب وعثمان ابن عفان رضي الله عنهما
لكن لا طلع مظاهراتن ولا حصل اضراب
إرسال تعليق